मुंबई : शिवसंग्राम संघटनेचे अध्यक्ष विनायक मेटे (Vinayak Mete) यांच्या गाडीचा मुंबई-पुणे द्रुतगती मार्गावरील माडप बोगद्याजवळ अपघात होऊन रविवारी त्यांचे निधन झाले आहे. अपघातामध्ये विनायक मेटे गंभीर जखमी झाले होते त्यामुळे त्यांना कामोठेतील एमजीएम रुग्णालयात दाखल करण्यात आले. पण रुग्णालयात दाखल करताच त्यांना मृत घोषित करण्यात आले. विनायक मेटेंच्या अंत्ययात्रेला बीडमध्ये सुरुवात झाली आहे. या अंत्ययात्रेला बीडकरांनी मोठ्या प्रमाणात गर्दी केली आहे.
आज दुपारी तीन वाजता बीडमधील जालना रोडवरील उत्तम नगरातील रिलायन्स पेट्रोल पंपाच्या मागील सिध्दीविनायक पार्क येथे त्यांच्या पार्थिवावर अंत्यसंस्कार होणार आहे. मुख्यमंत्री एकनाथ शिंदे (Eknath Shinde), उपमुख्यमंत्री देवेंद्र फडणवीस (Devendr Fadanvis) यांच्यासह राज्यभरातील नेते, पदाधिकारी, कार्यकर्ते अंत्यविधीसाठी उपस्थित राहणार आहेत.
अपघाती निधन –
विनायक मेटेंचा सहकारी एकनाथ कदम (Eknath Kadam) यांनी माध्यमांशी बोलताना अपघात कसा झाला याची माहिती दिली. ते म्हणाले, “आम्ही बीडवरून मुंबईला येत होतो. आम्हाला एका मोठ्या ट्रकनं कट मारला. त्यामुळे ट्रकच्या बंपरमध्ये कार अडकली आणि काही अंतरापर्यंत फरफटत गेली. पण मदत पोहोचण्यासाठी एक तास लागला. मी फोन केला तेव्हा कंट्रोल रूमवरच्या कर्मचाऱ्यांनी लवकरात लवकर प्रतिसाद दिला नाही. जवळपास ६ वाजता रुग्णवाहिका आली”