Supriya Sule । मुंबई : प्रसिद्ध गायक अवधुक गुप्ते यांच्या ‘खुपते तिथे गुप्ते’ या कार्यक्रमात राष्ट्रवादी काँग्रेस पक्षाच्या कार्यकारी अध्यक्ष तथा खासदार सुप्रिया सुळे यांनी हजेरी लावली. येत्या रविवारी हा कार्यक्रम प्रसारित केला जाणार आहे. या कार्यक्रमाचा प्रोमोशनल व्हिडिओ सध्या समोर आला आहे. त्यामध्ये सुप्रिया सुळे यांनी राष्ट्रवादी काँग्रेस पक्षाचे अध्यक्ष शरद पवार (Sharad Pawar) यांच्या स्वभावाचा उलगडा केला. (Latest Marathi News)
“शरद पवार फार कमी बोलतात,खूप मार्गदर्शन करत नाहीत. ज्यावेळी मी पहिल्यांदा खासदार झाले त्यावेळी त्यांनी मला एक सल्ला दिलेला तो आजही मला आठवतो. आज तू गेट नंबर एकने लोकसभेच्या पायऱ्या चढणार आहेस. मतदारांमुळे तुला ही संधी मिळाली आहे. दरवेळी पायऱ्या चढत असताना हे विसरु नकोस. ज्या दिवशी तू हे विसरशील त्यावेळी तुला ह्या पायऱ्या चढता येणार नाहीत,” अशी आठवण सुप्रिया सुळे यांनी सांगितली.
पुढे सुप्रिया सुळे यांनी राष्ट्रवादीतील बंडखोरीवरही भाष्य केले. “राष्ट्रवादी काँग्रेस पक्ष (NCP) फुटला नाही. राष्ट्रवादीचे राष्ट्रीय अध्यक्ष शरद पवार आणि महाराष्ट्राचे अध्यक्ष जयंत पाटील आहेत. अजित पवार हे राष्ट्रवादीच्या चिन्हावर निवडून आलेले आमदार आहेत. त्यांनी पक्षाच्या विचारधारेच्या विरोधात काही निर्णय घेतले असल्याने त्यांना पक्षाने नोटीस बजावली आहे,” असे सुप्रिया सुळे यांनी स्पष्ट केले.