murder of Karni Sena chief Sukhdev Singh Gogamedi । राजस्थानमध्ये राष्ट्रीय राजपूत करणी सेनेचे अध्यक्ष सुखदेव सिंह गोगामेडी यांची त्यांच्या घरात तीन हल्लेखोरांनी गोळ्या झाडून हत्या केली. आता या हत्येनंतर राज्यात तणाव वाढला आहे. जयपूरसह विविध ठिकाणी निदर्शने झाल्याची माहिती आहे, तर चुरूमध्ये सरकारी बसवर दगडफेक करण्यात आली. यासोबतच सुखदेव सिंह गोगामेडी यांच्या हत्येच्या निषेधार्थ राष्ट्रीय राजपूत करणी सेना आणि राजस्थानमधील इतर समुदायांनी बुधवारी म्हणजेच आज राज्यव्यापी बंदची घोषणा केली आहे.
या हत्याकांडावर राजस्थानचे डीजीपी उमेश मिश्रा म्हणाले की, राजपूत करणी सेनेचे प्रमुख सुखदेव सिंह गोगामेडी यांची जयपूरमध्ये हत्या करण्यात आली. मारेकरी चर्चा करण्याच्या बहाण्याने त्याच्या घरी आले होते. या घटनेत सुखदेव सिंग गोगामेडी यांचा मृत्यू झाला असून त्यांचा एक अंगरक्षक जखमी झाला आहे. मारेकऱ्यांसोबत असलेल्या एका आरोपीचाही गोळी झाडून मृत्यू झाला.
हल्लेखोरांच्या संभाव्य अड्ड्यांवर छापे टाकण्यात येत आहेत. या हत्येची जबाबदारी रोहित गोदरा टोळीने घेतली असून त्यांना लवकरच अटक करण्यात येईल, असे त्यांनी सांगितले. आम्ही हरियाणाच्या डीजींकडेही मदत मागितली आहे. असेही हे म्हणाले आहेत. (murder of Karni Sena chief Sukhdev Singh Gogamedi )
राजस्थान बंदची घोषणा
श्री राष्ट्रीय राजपूत करणी सेनेचे अध्यक्ष सुखदेव सिंह गोगामेडी यांच्या जयपूर येथील निवासस्थानी झालेल्या हत्येची न्यायालयीन चौकशी करण्याच्या मागणीसाठी ‘बंद’ पुकारण्यात आला आहे. यापूर्वी जयपूरमध्ये राजपूत करणी सेनेच्या समर्थकांनी रस्त्यावर उतरून सुखदेव सिंग गोगामेडी यांच्या हत्येबद्दल संताप व्यक्त केला होता. मेट्रो मास हॉस्पिटलबाहेर निदर्शने झाली आणि मानसरोवरात रस्ते अडवण्यात आले.